मुलुकमा भएको पहिलो आम निर्वाचनबाट २०१६ जेघ १३ गते बीपी कोइराला प्रधानमन्त्री बने । संसदमा दुई तिहाई वहुमत जितेर प्रधानमन्त्री बनेका बीपीले छ दशक अघि वनाएको मन्त्रीमण्डल नै नेपाली इतिहासकै समावेशी सरकार हो । त्यो रेकर्डलाई अहिलेसम्म कसैले तोड्न सकेको छैन । जवकी त्यो समयमा विश्वमै समावेशीताको अवधारणा बनि सकेको थिएन । 

पहिलो पटक सुदूर पश्चिमाञ्चलबाट द्वारिकादेवी ठकुरानी मन्त्री भइन् । उनी देशकै पहिलो निर्वाचित महिला सांसद र मन्त्री हुन् । त्यति मात्र होइन उनले दक्षिण एसियाकै पहिलो मन्त्रीको रेकर्ड समेत राखेकी छन् । तराईबाट रामनारायण मिश्र, परशुनारायण चौधरी, सूर्यनाथदास यादव मन्त्री भए । उपत्यकाबाट गणेशमान सिंह, मध्यपहाडी र हिमाली क्षेत्रबाट मीनबहादुर गुरूङ, योगेन्द्रमान शेरचन, जमानसिंह गुरूङ, देवानसिंह राई जनजाति अनुहार समेटिए ।” 

                                                       राजपत्रमा पहिलो निर्वाचित सरकार

बीपी प्रधानमन्त्री भएको एक महिना ३ दिनपछि असार १६ गते राजा महेन्द्र ३९ वर्ष पूरा गरी ४० वर्षमा प्रवेश गरेको अवसर पारेर नेपाल अधिराज्यको संविधान, २०१५ लागू भएको घोषणा गरियो । अनि २०१६ जेठ १३ गते अन्तरिम संविधान २००७ बमोजिम बीपीको नेतृत्वमा गठित सरकार विघटन गरी राजाले नयाँ संविधान बमोजिम बीपीलाई प्रधानमन्त्री पदको पुनः शपथ गराए । “नारायणहिटी राजदरबारमा असार १६ गते राति ११ बजे प्रधानमन्त्री र मन्त्रिमण्डलका सदस्यहरुलाई शपथ गराइएको थियो ।” प्रधानमन्त्रीको शपथ सकिएपछि राजाले भनेका थिए, “पीएम, अब हामी मिलेर काम गर्नुपर्छ । चाँडो देश बनाउनु छ । तपाईं चाहेको जुनसुकै बेला फोन गरेर भेट्न सक्नुहुन्छ ।” 
राजा महेन्द्र र बीपीबीच ‘लभ एन्ड हेट’ को सम्बन्ध थियो । बीपीलाई हेप्न सकिन्न भन्ने राजालाई राम्ररी थाहा थियो । उनी भन्ने गर्थे, “म राजा हुँ, प्रधानमन्त्री नोकर हो ।” बीपीको बुझाइ थियो, “म कसैको नोकर होइन, जनताको प्रतिनिधि हुँ । राणाहरुले राजालाई खोपीको देवता बनाएका थिए । हामीले बाहिर ल्यायांै तर यहाँभन्दा अगि बढ्ने कोसिस नगर ।”
राजा महेन्द्रको भनाइ र गराइमा आकाश–जमिनको भिन्नता थियो । उनी भन्थे एउटा, गर्थे अर्को । बीपीले भनेका छन्, “शपथपछि पहिलो पटक राजालाई भेट्न जाँदा मैले लामो समय पर्खनुप-यो ।” त्यति मात्र होइन, राजाले प्रधानमन्त्रीसँग भएका सबै वार्तालाप गोप्य रुपमा रेकर्ड गर्ने व्यवस्था मिलाएका थिए ।